Risorgimento

As Risorgimento^ⓘ/? (Italiänisch für Widergeburt/Widererstehig) bezeichnet me in dr italiänische Gschichtsschriibig s Ziitalter noch em Wiener Kongräss vo 1814/15, wo d Vereinigung vo de Fürstedümer und Regione uf dr Apennine-Halbinsle, wo denn sälbständigi Staate gsi oder vo fremde Mächt beherrscht worde si, in e unabhängige Nationalstaat Italie agsträbt worden isch, und au die politische und soziale Bewegige z Italie zwüsche 1815 und 1870, wo wältaschaulig sehr heterogen gsi si.

Dr italiänisch Staat isch as konstitutionelli Monarchii noch mehrere revolutionäre Ufständ und de Italiänische Unabhängigkeitschrieg 1861 as Königriich Italie gründet und 1870 mit dr militärische Eroberig vom Chillestaat und däm siiner Hauptstadt Rom dur italiänischi Druppe volländet worde.